ព័ត៌មានជាតិ

មន្ត្រីជាន់ខ្ពស់គណៈកម្មាធិការជាតិសុវត្ថិភាពចរាចរណ៍ផ្លូវគោក​សម្តែងក្តីបារម្ភចំពោះ​ករណី​គ្រោះថ្នាក់​ចរាចណ៍ 

ខេត្ដកណ្ដាល ៖ លោកជំទាវ មឹន មាណវី រដ្ឋលេខាធិការក្រសួងសាធារណការ និងដឹកជញ្ជូន និងជាអគ្គលេខា​ធិការ នៃគណៈកម្មាធិការជាតិសុវត្ថិភាពចរាចរណ៍ផ្លូវគោក បានសម្តែ​ង​ក្តី​បារម្ភ​ចំពោះ​ករណី​គ្រោះថ្នាក់ចរាចណ៍ផ្លូវគោកដោយ​សា​រការមិ​ន​គោរពច្បាប់ របស់បងប្អូនប្រជាពលរដ្ឋនៅពេលបើកបរ  ក្នុងនោះករណីស្លាប់ដោយសារគ្រោះថ្នាក់ចរាចរណ៍ នៅតែជាក្តីព្រួយបារម្ភ ដែលទាម​ទារឱ្យ​ពលរដ្ឋម្នាក់ៗចូលរួមគោរពច្បាប់ ខណៈដែលករណីស្លាប់ដោយសារជំងឺកូវីដ១៩ នៅ​ក្នុង​ប្រទេសកម្ពុជាបានថយចុះជាបន្តបន្ទាប់។ ការបង្ហាញនូវក្ដីព្រួយបារម្ភនេះ ក្នុង​យុទ្ធនា​ការ​ផ្សព្វផ្សាយអប់រំស្ដីពីច្បាប់ចរាចរណ៍ផ្លូវគោក មុនឱកាសព្រះរាជពិធីបុណ្យអុំទូក បណ្តែតប្រទីប និងសំពះព្រះខែ អកអំបុក ដែលស្ថិតនៅលើកំណាត់ផ្លូវជាតិលេខ៦ នៅខាងមុខសាលាស្រុក​មុខកំពូល ខេត្ដកណ្ដាល នាព្រឹកថ្ងៃទី១៥ ខែវិច្ឆិកា ឆ្នាំ២០២១។

លោកជំទាវ មឹន មាណវី បានគូសបញ្ជាក់ថា យុទ្ធនាការផ្សព្វ​ផ្សាយពីសុវត្ថិភាពចរា​ចរណ៍ផ្លូវគោក នេះមិនថានៅរាជធានីភ្នំពេញនោះទេសូម្បីតែនៅតាមបណ្តារាជធានី ខេត្ត​នានា​ក៏បានធ្វើការផ្សព្វផ្សាយអប់រំដល់ប្រជាពលរដ្ឋ ឱ្យគោរពច្បាប់​ច​រច​រណ៍ទាំងអស់គ្នា។ លោក​ជំទាវអគ្គលេខាធិការបានមានប្រសាសន៍ថា “គ្រោះថ្នាក់ចរាចរណ៍សម្លាប់ជីវិតមនុស្ស​ច្រើន​ណាស់ អីចឹងបើយើងណែនាំកុំឱ្យមានគ្រោះថ្នាក់ចរាចរណ៍គឺជាការធ្វើបុណ្យ​មួយធំ​ណាស់ ហើយសូមជួយផ្សព្វផ្សាយឱ្យពលរដ្ឋបានដឹង”។ លោកជំទាវបានបន្ដថា ការផ្សព្វផ្សាយ​អប់រំស្ដី​ពីច្បាប់ចរាចរណ៍ សុវត្ថិភាពចរាចរណ៍ផ្លូវគោកនេះ​ដោយសារស្ថានភាពជំងឺកូវីដ១៩​នៅក្នុង​ប្រទេសកម្ពុជាបានធូរស្រាលដោយសារពលរដ្ឋបានទទួលវ៉ាក់សាំងការពារជំងឺកូវីដ១៩បានច្រើន។ លោកជំទាវបានអះអាងថា “ឥឡូវនេះយើង​ប្រយុទ្ធឈ្នះជំងឺកូ​វីដ១​៩បានហើយ តែនៅ​ករណីគ្រោះថ្នាក់ចរាចណ៍មួយទៀត ដើម្បីធ្វើយ៉ាងណាប្រយុទ្ធឱ្យឈ្នះ ករណីនេះ ដើម្បីការ​ពារអាយុជីវិតបងប្អូនយើងនៅតាមដងផ្លូវ។ ឥឡូវកូវីដ១៩ ស្លាប់នៅសល់ប្រមាណ៥ ឬ៦នាក់​ទេ ក្នុង១ថ្ងៃ ប៉ុន្ដែគ្រោះថ្នាក់ចរាណ៍មានចំនួនច្រើន ដែលជាការធ្វើឱ្យព្រួយបារម្ភ”។

ជាមួយគ្នានោះដែរ លោកជំទាវអគ្គលេខាធិការបានបន្ថែមថា ក្នុងឱកាសពិធីបុណ្យុអុំទូក​ខាងមុខ  ក៏ដូចជាការបើកដំណើរការប្រទេសឡើងវិញក្រោយ​ករណីឆ្លងជំងឺកូវីដ១៩ បានធូរ​ស្រាលមក លោកជំទាវក៏បានណែនាំ​សូមកុំពិសាគ្រឿងស្រវឹង ហើយបើកបរ ពីព្រោះគ្រោះ​ថ្នាក់​ចរាចរណ៍បានកើតឡើងដោយសារតែអ្នកបើកបរពិសារគ្រឿងស្រវឹង។ លោកជំទាវក៏បាន​អំពាវ​នាវ​ដល់អ្នកបើកបរ និងអ្នកប្រើប្រាស់ផ្លូវទាំងអស់ សូមកុំបើកបរល្បឿនលឿន និងត្រូវតែ​ឈ្វេយល់ពីសិទ្ធិអាទិភាពនៅពេលបើកបរ  ដូចជាការវ៉ាជែង ឬការបត់ ក្នុងស្ថានភាពគ្រោះ​ថ្នាក់​ជាដើម។

ឯកឧត្ដម នាយឧត្តមសេនីយ៍ ហ៊ឹម យ៉ាន អគ្គស្នងការរងនគបាលជាតិបានលើក​ឡើង​ថា ក្នុងខែកញ្ញា និងខែតុលា ឆ្នាំ២០២១នេះ ក្រោយស្ថានភាពជំងឺកូវីដ១៩បានធូរស្រាល​ហើយ រាជរដ្ឋាភិបាលបើកប្រទេសឡើងវិញនៅគ្រប់វិស័យនោះ​បានធ្វើឱ្យចំនួនគ្រោះថ្នាក់​ចរា​ចរណ៍ឡើងខ្ពស់ បន្ទាប់ពីស្ថានភាពចរាចរណ៍មានការកើនឡើង។  ឯកឧត្ដម នាយឧត្តម​សេនីយ៍បានអះអាងថា គ្រោះថ្នាក់ដែលកើតឡើងភាគច្រើនគឺនៅពេលយប់ និងកើតឡើង​ចំពោះ​អ្នកជិះម៉ូតូ ដែលមាន៧៧ភាគរយ នៃចំនួនអ្នករងគ្រោះ ហើយក្នុងចំណោម អ្នកទាំងនោះ គឺអ្នកមិនពាក់មួក៧២ភាគរយ។

ឯកឧត្ដម នាយឧត្តមសេនីយ៍បានបន្ថែមថា សមត្ថកិច្ចបានចុះធ្វើការផ្សព្វផ្សាយ​អប់រំ​ ដល់អ្នកបើកបររថយន្តធុនធ្ងរ ដែលរយៈពេល១ម៉ោងបានអប់រំ អ្នកបើកបរប្រមាណ៦០គ្រឿង ដោយអប់រំឱ្យអ្នកបើកបរតាមគន្លងកណ្តាល ឬគន្លងខាងស្តាំ។ ឯកឧត្ដម នាយឧត្ដមសេនីយ៍​បានថ្លែ​ងបញ្ជាក់ថា “គោលបំណងរបស់យើងគឺអប់រំគិតពីសុវត្ថិភាព និងការប្រើប្រាស់គន្លង ផ្លូវចំពោះរថយន្តធំៗ”។ បើតាមឯកឧត្ដម នាយឧត្តមសេនីយ៍បានឱ្យដឹងថា មកដល់ពេលនេះ ខាងនគរបាលកំពុងរៀបចំបទដ្ឋានបន្ថែមទៀត ដើម្បីឱ្យប្រជាពលរដ្ឋកាន់តែយល់ដឹង​ដោយ​សារ​រយៈពេលមកនេះ រាជរដ្ឋាភិបាលបានធ្វើការសាងសង់ផ្លូវបានច្រើន ដូចជាការពង្រីកផ្លូវ  សាងសង់ផ្លូវល្បឿនលឿន ជាដើម។  “យើងនឹងរៀបចំអនុក្រឹត្យស្តីពីការត្រួតពិនិត្យ​ល្បឿន​ឡើង​វិញ បទដ្ឋានស្តីពីការប្រកាសឱ្យប្រើប្រាស់គន្លងផ្លូវ”។ នេះគឺជាការបញ្ជាក់បន្ថែមរបស់​ឯកឧត្ដម នាយឧត្តមសេនីយ៍ ហ៊ឹម យ៉ាន។

ឯកឧត្ដម នាយឧត្តមសេនីយ៍បានបន្ដទៀតថា បច្ចុប្បន្នអត្រាការប្រើប្រាស់យាន្តយន្ត​មាន​សន្ទុះខ្លាំង ដែលឆ្នាំខ្លះមានរហូតដល់៥០ភាគរយ ឬ២០ភាគរយ ដែលគិតមកដល់​ពេលនេះ​ រថយន្ត មានប្រមាណ២លានគ្រឿង  និងម៉ូតូប្រមាណ៦លានគ្រឿង។   ទន្ទឹមនេះ មានប្រជាពលរដ្ឋភាគច្រើនបានយល់ដឹងពីច្បាប់ចរាចរណ៍ ហើយក៏នៅមានប្រជាជនពល​រដ្ឋ​មួយចំនួនតូចតែប៉ុណ្ណោះមិនទាន់បានយល់ដឹងពី ច្បាប់ចរាចរណ៍។ ទោះបីជាយ៉ាងណា​ក៏ដោយ ឯកឧត្ដម នាយឧត្ដមសេនីយ៍ ហ៊ឹម យ៉ាន ក៏បានឱ្យដឹងផងដែរថា គណៈកម្មាធិការ​ជាតិ​សុវត្ថិភាព​ចរាចរណ៍ផ្លូវគោក និងសមត្ថកិច្ចនគរបាល នឹងនៅតែបន្ដខិតខំធ្វើការអប់រំផ្សព្វ​ផ្សាយច្បាប់ចរាចរណ៍ ផ្លូវគោកជូនដល់ប្រជាពលរដ្ឋបានយល់ដឹងដើម្បីធ្វើយ៉ាងណាចូលរួម កាត់បន្ថយគ្រោះថ្នាក់ចរាចណ៍នៅក្នុងប្រទេសកម្ពុជា។

ជាមួយគ្នានេះដែរ ឯកឧត្ដម នាយឧត្ដមសេនីយ៍បានថ្លែងបន្ថែមថា “ឥឡូវនេះបណ្តាញ​សង្គមបានចូលរួមចំណែកយ៉ាងសកម្មក្នុងការជួយផ្សព្វផ្សាយ ពីគ្រោះថ្នាក់ចរាចរណ៍ផ្លូវគោក ដូចជាប្រាប់ពីទីតាំងករណីគ្រោះថ្នាក់ ការផាកពិន័យអ្នកមិនគោរពច្បាប់ ហើយក៏ធ្វើការបន្ត​ផ្សព្វ​ផ្សាយទៀតដើម្បីធ្វើយ៉ាងណាដាស់ស្មារតីគាត់ឱ្យគោរពច្បាប់”៕

psm

Leave a Reply

Your email address will not be published. Required fields are marked *